Job 37

1 “Konke lokhu kwenza inhliziyo yami idikize ize itshede endaweni yayo.

2 Lalela! Lalela ukubhonga kwelizwi lakhe, ukuzamazama okuphuma emlonyeni wakhe.

3 Uyawukhulula umbane wakhe ngaphansi kwalo lonke izulu awuthumele emikhawulweni yomhlaba.

4 Ngemva kwalokho kuza umdumo wokubhonga kwakhe; uduma ngelizwi lakhe lobukhosi. Nxa ilizwi lakhe seliqaqamba ulikhulula lonke angalithinti.

5 Ilizwi likaNkulunkulu liduma ngezindlela ezimangalisayo; wenza izinto ezinkulu ngaphezu kokuzwisisa kwethu.

6 Utshela ungqoqwane athi, ‘Khithika phezu komhlaba,’ lezulu athi kulo, ‘Thululeka ube yisihlambo esikhulu.’

7 Ukuze kuthi bonke abantu abenzayo bakwazi ukusebenza kwakhe, uyammisa umuntu wonke emsebenzini wakhe.

8 Izinyamazana ziyacatsha; ziyakhusela ezikhundleni zazo.

9 Isiphepho siyaphuma ekamelweni laso, umqando uphume entshongolweni esikayo.

10 Ukuphefumula kukaNkulunkulu kukhupha iliqhwa, amanzi aluwaca ajiye abe yilitshe.

11 Ugcwalisa amayezi ngamanzi; ahlakaze umbane wakhe ngawo.

12 Ngokuqondisa kwakhe ayakhukhumala embese umhlaba wonke ukuze enze loba yini awalaya yona.

13 Uyawaletha amayezi ajezise ngawo abantu, loba ukuthelezela umhlaba wakhe ukuze atshengise uthando lwakhe.

14 “Lalela lokhu, Jobe; akume ukhumbule imimangaliso kaNkulunkulu.

15 Uyakwazi na ukuthi uNkulunkulu uwalawula njani amayezi enze umbane wakhe ulavuze?

16 Uyakwazi na ukuthi amayezi emi njani elengile, leyomimangaliso yakhe yena lowo opheleleyo elwazini?

17 Wena oginqiswa yikutshisa kwezigqoko zakho nxa umhlaba uthule zwi kubetha umoya waseningizimu,

18 ungamncedisa yini ukwendlala isibhakabhaka, esilukhuni njengesibuko sensimbi yethusi?

19 “Ake usitshele ukuthi pho sithini kuye; ngeke siyimise kuhle indaba yethu ngokuba kumnyama nje lapha kithi.

20 Atshelwe kambe ukuthi ngifuna ukukhuluma? Ukhona umuntu ongacela ukuthi aginywe?

21 Phela kakho ongalikhangela ilanga, njengoba licazimula kangaka esibhakabhakeni nxa umoya uwaphephule wonke amayezi kwathi nkwe.

22 Esuka enyakatho uqhamuka ngenkazimulo enjengegolide; uNkulunkulu uqhamuka ngobukhosi obesabekayo.

23 USomandla singeke simfinyelele njalo uphakeme ulamandla; ekwahluleleni kwakhe okuhle lokulunga okukhulu kacindezeli.

24 ‘Ngakho-ke abantu bayamhlonipha, ngoba kanti kabanaki yini bonke abahlakaniphileyo enhliziyweni?